Նյութը՝ Ռոզա Գրիգորյանի
Լուսանկարները՝ Արմեն Սիմոնյանի
Տեղադրվել է 27-11-2019
Կոմպոզիտոր Ռոբերտ Ամիրխանյանի 80-ամյակի առթիվ կազմակերպվեցին համերգներ
ՀՀ ժողովրդական արտիստ, կոմպոզիտոր Ռոբերտ Ամիրխանյանի 80-ամյակի առթիվ կազմակերպվեցին համերգներ: Կամերային երաժշտության ազգային կենտրոնի նախաձեռնությամբ և ՀՀ կրթության, գիտության, մշակույթի և սպորտի նախարարության աջակցությամբ՝ Կոմիտասի անվան կամերային երաժշտության տանը և Արամ Խաչատրյան համերգասրահում անցկացվեց երկու համերգային երեկո:

Նոյեմբերի 23-ին Արամ Խաչատրյան համերգասրահում անցկացվեց կոմպոզիտոր Ռոբերտ Ամիրխանյանի 80-ամյակին նվիրված երեկո, որը կրում էր «Այստեղ Հայաստանն է» խորագիրը: Հանդես եկան Արցախի պետական ջազ նվագախումբը և Արցախի պետական երգչախումբը, ինչպես նաև Ստեփանակերտի Սայաթ Նովայի անվան երաժշտական ուսումնարանին կից վարժարանի «Ծիածան» մանկական երգչախումբն ու մենակատարներ: Հնչեցին սիրված ամիրխանյանական մեղեդիներ, ինչպես օրինակ «Ժպտա», «Այնպես ուզում եմ», «Կարմիր ծաղիկ մը գարունի», «Քեզ հետ, իմ սեր», «Երազի իմ երկիր», «Հայի աչքեր», «Պույպույ մկնիկ» և այլ գործեր: 

Բոլոր ստեղծագործությունները Ռոբերտ Ամիրխանյանի  նոր երանգավորմամբ ջազ նվագախմբի և երգչախմբի համար ներկայացվեցին առաջին անգամ: Երեկոն իր ներկայությամբ պատվեց ՀՀ վարչապետ Նիկոլ Փաշինյանը, ով նաև պարգևատրեց կոմպոզիտորին: 

Նոյեմբերի 25-ին Կոմիտասի անվան կամերային երաժշտության տանը կայացավ «Տարիների սիրված մեղեդիներ» խորագրով երեկո, որին բացի կոմպոզիտորից հանդես եկավ նաև կոնտրալտո Սեդա Ամիր-Կարայանը (Գերմանիա):

Կոմպոզիտոր Ռոբերտ Ամիրխանյանը ծնվել է 1939 թ. Երևանում։ Ավարտել է Երևանի Կոմիտասի անվան պետական կոնսերվատորիայի՝ Էդուարդ Միրզոյանի դասարանը:

Եղել է Հայկական ռադիոյի երաժշտական խմբագիրը: 1984 թվականին նրան շնորհվել է Հայաստանի վաստակավոր արտիստի, իսկ 1986 թվականին՝ Հայաստանի ժողովրդական արտիստի կոչումները: Երևանի Կոմիտասի անվան պետական կոնսերվատորիայի պրոֆեսոր է: 1991-2013թթ. եղել է Հայաստանի Կոմպոզիտորների միության նախագահը: Հեղինակել է ավելի քան 300 երգ, վոկալ շարքեր, օպերետներ («Ատամնաբույժն արևելյան»), երաժշտություն է գրել 16 խաղարկային և շուրջ 30 մուլտիպլիկացիոն ֆիլմերի համար: Հեղինակել է այնպիսի հայտնի և սիրված երգերի երաժշտություններ, ինչպիսիք են օրինակ` «Հայի աչեր», «Հայրենի երկիր» և այլն: 1998 թվականին պարգևատրվել է ՀՀ «Մեսրոպ Մաշտոց» շքանշանով: 2012 թվականին «Երևանյան ռապսոդիա» ստեղծագործության համար արժանացել է ՀՀ Պետական մրցանակի: 

Պատկերասրահ՝ Ռոբերտ Ամիրխանյանի 80-ամյակին նվիրված համերգ